جملة صغيرة في اغنية راب لعامر الطاهر سمعتها زمان و لفتت انتباهي بالتشبيه العظيم الي فيها بس عمري ما حسيتها ، كانت مجرد تشبيه او حتى صورة شعرية بسيطة و جميلة في نفس الوقت فكرت فيها شوي لما شبه الدم في الفيمتو بس كان تفكير عابر و ما اخذ حيز كبير من وقتي .
رحت اتعرف على خالي الي فعليا ما بعرفه سافر و انا عمري 6 سنين و اله 17 سنة ما شفته يعني فعليا بعرفوش ، بس كنت حابب اتعرف عليه بس يا اخي ما كنت اتوقع ارتاح عنده او احسه قريب علي ، كنت مفكر اشوفه بس يوم و اروح خلص !
رحت عنده يا اخي و بس شفته اول 20 ثانية تقول الي بعرفه مليون سنة و اول مبارح في الليل سهرانين سوا ، عمرك شفت حدا انت بتعرفوش و حسيته اهلك ؟ ناسك ؟ ريحة الحبايب ؟ مش غريب ابدا و مش مستغربه ؟ اكيد لا لانه لسا انت ما بتعرفه ، حتى حكيت لامي بس قالتلي روح زور خالك قلتها : يمة والله خالي لو اشوفه في الشارع بعرفوش بس بدي اروح اتعرف عليه .
كلشي بِعمله بِقوله تقول كان طول عمره عايش معنا انا و هو في الدار 3 ايام الحكي ما سكت و احنا بنحكي بنحكي بنحكي بنحكي ما سكتنا ماخذين على بعض تقول واحد عايش معنا من مليون سنة و عارفنا منيح و عارفينه و الاستغراب مش موجود ابدا بينا ، قعدت عنده اكثر ما كنت بتوقع و ارتحت عنده تقول قاعد في دارنا و ما كان جاي على بالي اروح من عنده و كنت كل يوم بس اروح على تخت ابنه بدي انام افكر كيف هيك ؟ افكر شو حكينا ؟ يا رجل ماخذين على بعض ولا كانه تقول 17 سنة مش شايفه بعد تفكير ساعة تقريبا اجى صوت من بعيد في راسي عامر الطاهر في اغنية " البحر النضاح " بقول : الدم على الدم عمره الدم ما بصير فيمتو !!
رابط اغنية عامر الطاهر البحر النضاح
